Hökümetiň giňişleýin mejlisinde Ministrler Kabinetiniň Başlygynyň ylym, bilim, saglygy goraýyş, sport, ýaşlar we jemgyýetçilik toplumy boýunça orunbasary gözegçilik edýän ulgamlarynda 2025-nji ýylda alnyp barlan işleriň netijeleri barada hasabat berdi.

Hasabat döwründe halkara ylmy-amaly, okuw-usuly maslahatlar, olimpiadalar geçirildi. Okuwçy we talyp ýaşlar halkara ders hem-de internet bäsleşiklerinde üstünlikli çykyş edip, dürli medallara mynasyp boldular. Ylym ulgamyny kämilleşdirmek, ylmy barlaglaryň netijeliligini ýokarlandyrmak babatda degişli işler alnyp baryldy. Ylmyň ugurlary boýunça aspirantura, doktorantura kabul edildi, alymlyk derejesine dalaşgärler hasaba alyndy, dissertasiýalar goraldy.

Ylymlar güni mynasybetli “Berkarar döwletiň täze eýýamynyň Galkynyşy döwründe ylym, tehnika we innowasion tehnologiýalar” atly halkara ylmy maslahat, ýaşlaryň arasynda ylmy işler boýunça bäsleşigiň ýeňijilerini sylaglamak dabarasy guramaçylykly geçirildi.

Hormatly Prezidentimiz ýurdumyzda bilim edaralarynyň işini kämilleşdirmegiň, bilim tehnologiýalaryny giňden ornaşdyrmagy dowam etdirmegiň, hünär bilimini kämilleşdirip, hünärmenleri taýýarlamagyň hilini ýokarlandyrmagyň, alnyp barylýan ylmy-barlag işlerini ilerletmegiň, bu ugurda halkara hyzmatdaşlygyň gerimini giňeltmegiň möhümdigini aýtdy.