Türkmenistanyň Daşary işler ministrliginde 25-nji iýulda adam hukuklary babatda halkara borçnamalarynyň we halkara ynsanperwer hukugynyň ýerine ýetirilmegini üpjün etmek boýunça toparynyň mejlisi geçirildi. Mejlise gatnaşyjylar şu ýylyň birinji ýarym ýyllygynda ýerine ýetirilen işleriň jemini jemlediler we öňümizdäki döwür üçin ileri tutulýan wezipeleri kesgitlediler. Bu barada Türkmenistanyň Daşary işler ministrliginiň metbugat gullugy habar berýär.

Duşuşygyň barşynda 2024–2026-njy ýyllar üçin Halkara ynsanperwer hukugyny durmuşa geçirmek boýunça çäreler Meýilnamasynyň ýerine ýetirilişine garaldy, şeýle hem pudagara hyzmatdaşlygyny berkitmegiň ähmiýeti nygtaldy.

Mejlise gatnaşyjylar aýratyn üns bilen Türkmenistanda raýatlaryň hukuklaryny we azatlyklaryny goramagyň milli ulgamyny halkara ölçeglerine laýyklykda mundan beýläk-de kämilleşdirmek maksady bilen işlenip taýýarlanylan 2026–2030-njy ýyllar üçin Adam hukuklary boýunça hereketleriň Milli meýilnamasynyň taslamasyna seredip geçdiler.

Türkmenistanyň Daşary işler ministri Raşid Meredow çykyşynda döwlet syýasatynyň bu ugurdaky alyp barýan işleriniň ýurduň ynsanperwer ugruny hem-de halkara borçnamalaryny yzygiderli ýerine ýetirmäge ygrarlylygyny beýan edýändigini belledi. Mejlisiň jemleri boýunça toparyň işiniň netijeliligini ýokarlandyrmak boýunça anyk çäreler bellenildi.

Yza