Yslamabat şäherinde Türkmenistanyň Pakistandaky ilçisi Atajan Möwlamow bilen Maldiwler Respublikasynyň Pakistandaky ýokary komissary Mohamed Tohanyň arasynda duşuşyk geçirildi. Duşuşygyň dowamynda dostlukly ýurduň wekili Türkmenistan bilen, esasan hem, syýahatçylyk we söwda-ykdysady ugurlarda has ýakyn gatnaşyklary ýola goýmaga gyzyklanma bildirdi.

Taraplar sebitdäki ykdysady ýagdaýyň ösüşine aýratyn üns berdiler. Gepleşikleriň netijesi boýunça  Türkmenistan bilen Maldiw Respublikasynyň arasynda eksport we import mümkinçiliklerini öwrenmek üçin has köp duşuşyklary geçirmek barada ylalaşyldy.

Türkmen diplomaty Aziýa-Ýuwaş umman sebitiniň ýurtlary bilen köpugurly hyzmatdaşlygy işjeňleşdirmegiň Türkmenistanyň daşary syýasatynyň ileri tutulýan ugurlarynyň biridigini nygtady. Bu babatda türkmen tarapy Maldiwler Respublikasy bilen ikitaraplaýyn syýasy gatnaşyklary pugtalandyrmaga we onuň gerimini giňeltmäge aýratyn ähmiýet berýär. 

Çeşme: Türkmenistanyň Pakistandaky ilçihanasy