3-nji iýulda Awaza milli syýahatçylyk zolagynda BMG-niň Deňze çykalgasy bolmadyk ösüp barýan ýurtlar boýunça üçünji maslahatynyň açylmagy mynasybetli baýdak galdyrmak dabarasy geçirildi.

Baýdak galdyrmak dabarasyna Ministrler Kabinetiniň orunbasary, Türkmenistanyň Daşary işler ministri Raşid Meredow we BMG-nyň Baş sekretarynyň orunbasary, BMG-niň Pes ösen, Deňze çykalgasy bolmadyk ösüp barýan ýurtlar we kiçi ada döwletler boýunça Ýokary wekili Rabab Fatima gatnaşdy.

Türkmenistan BMG-niň Deňze çykalgasy bolmadyk ösüp barýan ýurtlar boýunça üçünji maslahaty üstünlikli geçirmek üçin ähli zerur taýýarlyk çärelerini gördi.

Bu möhüm waka Türkmenistanyň Birleşen Milletler Guramasyna halkara parahatçylygy we howpsuzlygy goramak we berkitmek, ähli döwletleriň we halklaryň durnukly ösüşini üpjün etmek meseleleri boýunça dünýä jemgyýetçiliginiň ygtyýarlyklary berlen ähliumumy halkara platformasy hökmünde garaýandygyny görkezýär.