Türkmenistanyň wekiliýeti 7–9-njy sentýabrda Dubaý şäherinde geçirilen «AIM Congress 2026» atly XV Halkara maýa goýum kongresine gatnaşdy. Çärä Türkmenistanyň Birleşen Arap Emirliklerindäki Ilçisi Baýram Baýramow ýolbaşçylyk etdi. Bu barada Türkmenistanyň Daşary işler ministrliginiň metbugat gullugy habar berdi.

«Ählumumy ösüşe täzeden garamak: durnukly we inkluziw geljege tarap täze maýa goýum ýollaryny açmak» şygary bilen guralan kongres döwlet edaralarynyň ýolbaşçylaryny, halkara guramalaryň wekillerini we iri işewür toparlary bir ýere jemledi. Forumda 191 ýurtdan we guramadan wekiller gatnaşdy.

Kongresiň dowamynda Türkmenistanyň wekiliýeti açylyş dabarasyna, şeýle hem maýa goýum hyzmatdaşlygy, ykdysady ösüş we senagat syýasaty boýunça geçirilen tematiki mejlislere gatnaşdy. Hususan-da, BMG-niň Aziýa we Ýuwaş umman sebiti üçin Ykdysady we durmuş komissiýasy bilen bilelikde guralan Merkezi Aziýa boýunça panel ara alyp maslahatlaşmasy, ministrler derejesindäki tegelek stol duşuşygy, erkin ykdysady zolaklaryň ösüşi we senagat syýasaty boýunça mejlisler geçirildi.

Wekiliýetiň düzümine Türkmenistanyň Maliýe we ykdysadyýet ministrliginiň, Senagat we gurluşyk önümçiligi ministrliginiň hem-de Türkmenistanyň Döwlet daşary ykdysady iş bankynyň wekilleri girip, halkara maýa goýum hyzmatdaşlygynyň häzirki ugurlary boýunça geçirilen maslahatlara gatnaşdylar. Çäräniň çäklerinde Türkmenistanyň wekilleri halkara maliýe edaralarynyň, iri kompaniýalaryň we maýa goýumlary çekmek boýunça ýöriteleşdirilen guramalaryň wekilleri bilen ikitaraplaýyn duşuşyklary geçirip, hyzmatdaşlygyň täze mümkinçiliklerini ara alyp maslahatlaşdylar, kongresiň çäklerinde guralan halkara sergi ekspozisiýasy bilen tanyşdylar.

Yza